Ik rie van Finnerwolle noar Beerte en Hörn
t Is zomor n dag, gain regen en gain zörgen
Mien ogen kieken wied vot over t koren noar de diek
Ik denk aan n bouk, aan de "Groanrepubliek"

In "de rooie drijhouk" mit zien riep gruine gras
t Gele van t koolzoad en hou t hier ooit was
Oost Grunnen, schoem op t wotter, t verleden is dichtbie
Koert Stek en zien Tjakkie rieden in n Lada veurbie

Refraain:
Stalin en Lenin, boeren en klaai
Stro en groan, groan en stro
Rechte lienen in landschop en leer
Toukomst en dieken, meer en meer
Stalin en Lenin, boeren en klaai

In Drijbörg goa k rechtsoaf deur Coenraadpolder hin
Ik zai n rover vlaigen en heb t noar mien zin
t Is net of gaist van Mansholt hier boven de dieke woakt
In n mengelmous van zolt en zuit, dat is wat mie roakt

In polder Breebaart vuil k mie goud, k heb de kop doar op stee
n Coaster uut Kaliningrad gliert deur de wolken in de zee
Bie Fiemel doar stop ik en kiek noar Oost Grunnen
n Mooi stee is dat hier om vannijs te begunnen.